〈寢不語〉 關夢南
我嗌佢
佢唔睬我
仲擰歪個臉
扮吓嘢
個房冷氣咁大
佢唔冚被
仲以為自己
老虎都打死幾隻
唔單止咁
九十幾歲人
仲玩捉匿匿
但天咁黑
我點樣搵到你
佢匿埋響櫃桶？
佢匿埋響衣櫥？
佢匿埋響浴缸？
抑或匿埋響
窗簾布後面
失驚無神出嚟嚇吓我？
我開始有啲驚
驚佢走出街
佢有白內障㗎
紅燈如果睇成綠燈
咁點算好？
我搵醫生
醫生話：又係你哋吩咐
如果佢瞓咗
唔好嗌醒佢
原來佢不過瞓咗
我用手撫摸
佢微涼嘅眼皮
我一根根理順
佢無乜嘅頭髮
我突然間又諗起
天咁黑，條路咁長
我無攞枝電筒俾佢
佢點識返嚟屋企？
我真係大頭蝦
佢一定唔高興
佢一定發晒𤷪𤺧（按：即忟憎）
我其實仲想佢鬧我
好似從前咁：
「唔夠人打
返嚟無飯食……」
細時嘅嘢無謂再提
佢應該知我已經大個仔
佢無乜嘢再放心唔落
「唔夠人打
佢個仔可以打住一半
或者走啫……」
佢講得啱
大個仔唔好再亂諗嘢
大個仔要好似佢咁
「食不言、寢不語」
寢──不──語……
原來係咁解
阿媽，我依家知道
我大個仔……啦……
2001年
摘自《關夢南詩集》，頁14-16。
沒有留言:
張貼留言